唔知大家係搵工路上，有冇中過伏呢？小編就有中過伏，做過水魚，依家話你知5個求職陷阱，唔好重蹈小編覆轍啊！！
1. 個人資料透露
有啲公司招聘時就會要求申請人提供埋重要且敏感嘅個人私隱，例如銀行户口號碼、信用卡號碼。甚至有啲其實係假招聘，一心只想呃你上去interview時套你個人資料，從而騙取金錢。普遍公司只會喺你通過interview之後，正式請你嘅時候先會要求出示呢啲資料證明。如果覺得可疑，要考慮要求是咪合理，可以嘗試拒絕。對來歷不明嘅招聘廣告要提高警覺，保護個人私隱。
2. 低要求高人工
唔好咁多幻想，天下間邊有咁多荀工，仲要睇中你？呢啲所謂「荀工」無學歷、工作經驗要求，但人工又幾理想，時薪幾百蚊。仲分分鐘唔洗見工，肯apply就即刻有得開工。以小編所知嘅有運水貨去大陸、賣冒牌貨等等，如果涉及非法勾當或者觸及法例，後果可大可小，唔好因小失大，貪方便搵快錢招麻煩。建議睇清楚工作有無問題，了解咗背景先好apply。
3. 過份簡單工作
相信大家都係Facebook嘅搵工平台見唔少「在家打字」嘅工作，其實有唔對勁！
第一，呢啲工作係要你將圖片內文字，打返出黎。所要求嘅技能相當簡單同輕鬆，依家有技術可以快速將有文字嘅圖片轉做文字檔案，而電話語音輸入都可以完成到呢份工作，真係有咁大隻蛤乸隨街跳？天下間有咁荀嘅工大概無窮人了。
第二，工作強調無地區限制，用Wechat同你聯絡，聯絡人用語字眼唔似本地人，甚至打簡體字，分分鐘其實幫緊內地人打工。再者，出糧問題，如果真係幫緊內地工作嘅話，户口轉帳方面又係點呢？
4. 直銷工作或層壓式推銷
有啲直銷公司會極力游說人買貨，加入直銷行列，之後要求員工借超過十萬元入貨、強逼員工透露朋友個人資料、比錢報讀課程，騙取金錢。
而層壓式推銷係指參加者須要負擔好高昂嘅參加費用，透過「拉人頭」方式以賺取利潤，而唔會好著重產品銷售。貨品往往較市面昂貴，再而招攬人入會做下線員工，去賺利潤。千祈唔好見到高薪厚職就一時被迷惑，最好上網check吓公司過往有無不良嘅新聞。
5. 貼錢工作
如上面所講，有啲公司會未返工先要你比錢。以各種理由同藉口徵收唔合理嘅費用，例如行政費、保證金、試鏡費、推薦金等，或者要求你比錢報讀訓練班、課程。遇到喺工作前就要先付費嘅工作真係要小心，正路公司不會要求求職者貼錢工作，大家遇到呢啲招聘要認真考慮。
